قصتنا بدأت بحلم كبير, كنت دايما بشوف ان في أمور مالية كتير في حياتنا مش ماشية صح, وكان جوايا ترمومتر بالفطرة بقيس بيه, ولما كنت أرجع وأقرأ ألاقي إن الترمومتر ده فعلا صح, وإننا للأسف متعلمناش أي حاجة عن الثقافة المالية.
قررت أنمي نفسي وتخصصت في مجال الاقتصاد, ووصلت لمرحلة الدكتوراه, وقرأت كتب كتير في المجال ده, أصله مجال شغفي, ومستغربتش لما لقيت كل اللي حوليا بيرجعولي في تنظيم امورهم المالية. وبدأت رحلة البحث عن ازاي اقدر اساعد الناس في الحاجة اللى أنا مميز فيها, وانا شايف كتير من اللى حواليا للأسف بيلفوا في ساقية, ومهما كان دخلهم, كانت النتيجة دايما صفر.
ومن هنا قررت ادور على طريقة عملية علمية احط بيها سيستم امشي عليه, واطبق على نفسي قبل غيري, وكان قدوتي في المجال ده ناس عالميين, واتعلمت منهم كتير, بس للأسف كان في مشكلة صغيرة, ان اغلبهم من اوروبا وامريكا, والنظام المالي هناك مختلف كتير عننا, عشان كده بدأت اجرب طرق كتيرة لحد ما وصلت لسيستم اخيرا ونجح بالتجربة.
وكمان واجهت مشكلة تانية, صحيح في كتب كتيرة, وناس كتيرة ممكن تتكلم احسن مني في الموضوع ده, بس كان دايما في حاجة ناقصة, كان الكلام كله.. كلام وفقط, مفيش خطة امشي عليها, عشان كده كان لازم يكون ليا أنا السبق, وأساعد نفسي وأساعد غيري بخطة محكمة هتعوضك فعلا عن انك متعلمتش الثقافة المالية طول حياتك
